ប្រធានកម្មវិធីសិទ្ធិការងារ នៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា បានអះអាងនៅយប់ថ្ងៃសុក្រ ទី ២ ខែមីនាថា កងកម្លាំងមានសមត្ថកិច្ច បានចាប់ខ្លួនអភិបាលក្រុងបាវិត ខេត្តស្វាយរៀងបានហើយ។
អភិបាលក្រុងបាវិត ឈ្មោះ ឈូក បណ្ឌិត ដែលកម្លាំងមានសមត្ថកិច្ចចាប់ខ្លួន ត្រូវគេសង្ស័យថា បានបាញ់កម្មកររោងចក្រឱ្យរបួសធ្ងន់ចំនួន ៣ នាក់ កាលពីថ្ងៃទី២០ ខែកុម្ភៈ ឆ្នាំ២០១២។
ការបាញ់ឱ្យរបួសនេះ បានកើតឡើងក្នុងពេលដែលកម្មកររាប់ពាន់នាក់បម្រើការក្នុងរោងចក្រ មួយចំនួន នៅតំបន់សេដ្ឋកិច្ចពិសេស ម៉ាន់ហាថាន់ (Manhattan) នាក្រុងបាវិត ខេត្តស្វាយរៀង នាំគ្នាធ្វើកូដកម្មទាមទារដំឡើងប្រាក់រង្វាន់ និងប្រាក់ថ្លៃបាយ នៅថ្ងៃទី២០ ខែកុម្ភៈនោះ។
ការតវ៉ាបានក្លាយជាអំពើហិង្សា ដោយសារក្រុមកម្មករបានចោលដុំថ្មទៅលើអាគាររោងចក្រ។ ភ្លាមៗ នោះ មានជនមិនស្គាល់មុខបានបាញ់ជាច្រើនគ្រាប់ទៅលើក្រុមអ្នកតវ៉ា ហើយបណ្ដាលឲ្យកម្មការិនី ៣ នាក់ នៅរោងចក្រផលិតស្បែកជើងឈ្មោះ កៅវ៉េ (Kaoway) រងរបួស។
សង្គមស៊ីវិល បានសាទរចំពោះចំណាត់ការរបស់សមត្ថកិច្ច ក្នុងកិច្ចខិតខំប្រឹងប្រែង តាមចាប់ខ្លួនអភិបាលក្រុងបាវិត ឈ្មោះ ឈូក បណ្ឌិត បាន នៅថ្ងៃសុក្រ ទី២ មីនា ឆ្នាំ ២០១២។
កម្មការិនីម្នាក់ ដែលរបួសធ្ងន់កំពុងព្យាបាលរបួសនៅក្នុងមន្ទីរពេទ្យ កាល់ម៉ែត នៅឡើយ៕ កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែ ប៉ុណ្ណោះ។
ប្រភព៖ RFA
0 មតិ:
Post a Comment