ភ្នំពេញៈ លោកវេជ្ជបណ្ឌិត វេរ៉ាផាន់ កនសុងថាំ ឯកទេសខាងវះកាត់សរសៃប្រសាទ និងឆ្អឹងខ្នងនៃមន្ទីរពេទ្យបំរ៉ុងរ៉ាត់អន្តរជាតិនៅទីក្រុងបាងកកនោះ នឹងមករាជធានីភ្នំពេញនៅខែក្រោយ។ លោកនឹងផ្តល់សេវាប្រឹក្សាដល់អ្នកជំងឺឆ្អឹងខ្នងនៅកម្ពុជាដោយឥត គិតថ្លៃ។
ទស្សនកិច្ចរបស់លោកវេជ្ជបណ្ឌិត វេរ៉ាផាន់ ត្រូវបានរៀបចំដោយមន្ទីរពេទ្យបំរ៉ុងរ៉ាត់ និងមន្ត្រីសុខាភិបាលក្នុងស្រុក ខណៈលោកនឹងធ្វើការព្យាបាលជំងឺផ្នែកឆ្អឹងខ្នងនេះដោយឧបករណ៍ វះកាត់អង់ដូស្កុប (endoscopic surgery)។
វេជ្ជបណ្ឌិតរូបនេះនឹងការប្រឹក្សាដោយឥតគិតថ្លៃដល់ប្រជាជន កម្ពុជាដែលមានបញ្ហាខាងជំងឺឆ្អឹងខ្នង ហើយលោកនឹងជួយធ្វើសំណើឲ្យទៅព្យាបាលនៅឯមន្ទីរពេទ្យបំរ៉ុងរ៉ាត់ តែម្តង។
ក្រោយពីបញ្ចប់ការសិក្សាផ្នែកវេជ្ជសាស្ត្រនៅប្រទេសថៃ លោក វេរ៉ាផាន់ ក៏ទៅបន្តការសិក្សានៅ អាល្លឺម៉ង់ និងសហរដ្ឋអាមេរិក ដោយលោកបានសិក្សាស្រាវជ្រាវផ្នែកវះកាត់ដោយមិនកាត់សាច់ (MIS) ផងដែរ។
បច្ចុប្បន្នលោកវេជ្ជបណ្ឌិត វេរ៉ាផាន់ ជានាយកនៃវិទ្យាស្ថានស្រាវជ្រាវផ្នែកឆ្អឹងខ្នងបំរ៉ុងរ៉ាត់(BSI) និងជាអ្នកបណ្តុះបណ្តាលក្រុមវេជ្ជបណ្ឌិតនៅជុំវិញពិភពលោកប្រើឧបករណ៍វះកាត់អង់ដូស្កុប។
បញ្ហាឆ្អឹងខ្នងគឺជាជំងឺសាមញ្ញម្យ៉ាងដែលកើតឡើងនៅលើសព៌ាង្គកាយមនុស្សយើង។ វាបង្កឡើងដោយការលើករបស់ធ្ងន់ៗ ការមានស្នាមរបួសដោយសារតែគ្រោះថ្នាក់ចរាចរណ៍ ឬគ្រោះថ្នាក់ដោយចៃដន្យ ការជាប់គាំងបណ្តាញឆ្អឹង ការមិនកម្រើកខ្លួន និងការមានជំងឺខូចខួរឆ្អឹងខ្នង ឬជំងឺសន្លាក់។
ការប្រើឧបករណ៍វះកាត់អង់ដូស្កុប គឺមានការប្រើប្រាស់នូវប្រព័ន្ធកាមេរ៉ាដ៏តូចមួយ ដើម្បីជ្រៀកមើលតាមសន្ទះឆ្អឹងខ្នងតូចៗនៅជុំវិញចន្លោះសាច់ដុំ តែម្តង ហើយវាក៏ប្រើរយៈពេលខ្លីក្នុងការព្យាបាលឲ្យជាសះស្បើយដែរ។
វិទ្យាស្ថានស្រាវជ្រាវផ្នែកឆ្អឹងខ្នងនៅមន្ទីរពេទ្យបំរ៉ុងរ៉ាត់ (BSI) ត្រូវបានបំពាក់នូវឧបករណ៍ទាំងអស់នេះ។
លោកវេជ្ជបណ្ឌិត វេរ៉ាផាន់ បានមានប្រសាសន៍ថា៖ «ក្រុមអ្នកឯកទេសវះកាត់យើងកំពុងតែធ្វើការជាមួយក្រុមអ្នកឯកទេសអាល្លឺម៉ង់ ដើម្បីបង្កើនបច្ចេកទេស និងអភិវឌ្ឍឧបករណ៍វះកាត់។ យើងក៏មានបំណងចង់ពង្រីកចំណេះដឹងផ្នែកនេះនៅអាស៊ី ជាមួយនឹងការប្រើឧបករណ៍វះកាត់អង់ដូស្កុបដែលត្រូវបានប្រើប្រាស់លើ អ្នកជំងឺឆ្អឹងកងខ្នង និងឆ្អឹងខ្នង៩៥ភាគរយ»។
កាលពីឆ្នាំមុនមន្ទីរពេទ្យបំរ៉ុងរ៉ាត់បានព្យាបាលអ្នកជំងឺជាងមួយ លាននាក់។ អ្នកជំងឺជិតពាក់កណ្តាលមកពីបណ្តាប្រទេសផ្សេងៗក្រៅពីថៃ នេះបើតាមការឲ្យដឹងរបស់មន្ទីរពេទ្យ។
ចំណែកតម្លៃសម្រាប់ព្យាបាលដូចនៅក្នុងសហរដ្ឋអាមេរិក និងនៅប្រទេសអូស្រ្តាលីដែរ ខណៈបណ្តាប្រទេសទាំងនោះក៏ធ្លាប់បានបញ្ជូនអ្នកជំងឺខ្លួនមកសម្រាក វះកាត់ព្យាបាលជំងឺឆ្អឹងខ្នងនៅមន្ទីរពេទ្យបំរ៉ុងរ៉ាត់ផងដែរ។
ក្នុងឆ្នាំ២០១១ មានអ្នកជំងឺកម្ពុជាប្រមាណជា១៥ ០០០ ដែលបានធ្វើដំណើរទៅព្យាបាលជំងឺនៅមន្ទីរពេទ្យបំរ៉ុងរ៉ាត់ ប្រទេសថៃ៕
0 មតិ:
Post a Comment