ពាក្យចចាមអារាមជាច្រើនកាលពីពេលមុននេះ បានលើកឡើងស្រដៀងៗគ្នាថា iPhone 5 នឹងត្រូវចេញនៅរដូវក្ដៅខាងមុខ ពោលគឺក្នុងត្រីមាសទីបី។ ប៉ុន្ដែក្រោយពី Apple បានប្រកាសពីការទទួលបានប្រាក់ចំណេញប្រចាំត្រីមាសទីមួយដ៏លើសលប់ នោះមក បានធ្វើឲ្យក្រុមអ្នកជំនាញ គិតថា Apple នឹងមិនទាន់ចេញ iPhone 5 នោះទេ។
កាលពីពេលថ្មីៗនេះ Apple បានទទួលប្រាក់ចំណេញដល់ទៅ ៣៩,១ពាន់លានដុល្លារ ដោយលក់បាន iPad ជិត១២លានគ្រឿង, iPod ៤លានគ្រឿង និងកុំព្យូទ័រ Mac ៤លានគ្រឿង។
ចំនួនលក់ខាងលើនេះគឺច្រើនណាស់ ប៉ុន្ដែអ្វីដែលច្រើនបំផុតនោះ គឺ iPhone ដែល Apple បានលក់ដាច់ដល់ទៅ ៣៥,១លានគ្រឿង។ Wall Street Journal បានទស្សន៍ទាយថា នេះគឺដោយសារតែតម្រូវការដ៏ច្រើននៅប្រទេសចិន ចាប់តាំងពី iPhone 4S លក់នៅទីនោះក្នុងខែមករា។
តម្រូវការដ៏ច្រើននៃ iPhone 4S ដែលនៅតែបន្ត អាចជាកត្តាមួយយ៉ាងធំ ដែលជម្រុញឲ្យ Apple ពន្យារពេលចេញ iPhone 5។ តើ Apple ចាំបាច់អ្វី នឹងកែឆ្នៃផលិតផលថ្មី ខណៈដែលរូបរាងដើម នៅតែជាទីពេញនិយមនោះ?
មួយវិញទៀត ទីផ្សារនៅប្រទេសខ្លះ iPhone 4S ទើបតែដាក់លក់បានមួយខែប៉ុណ្ណោះ បើទោះបីជាទូរសព្ទនេះ ចេញតាំងពីខែតុលា ឆ្នាំ២០១១ក៏ដោយ ដែលមានន័យថា iPhone 4S នៅជាផលិតថ្មីនៅឡើយ ហើយតម្រូវការក៏នៅតែមានច្រើន។ Apple ប្រហែលជាប្រញ៉ាប់ចេញថ្មី ដល់ថ្នាក់ធ្វើឲ្យផលិតផលដែលមានស្រាប់ ប្រែជាហួសសម័យនោះទេ។
លើសពីនេះទៀត Apple បានចេញតម្រុយខ្លះទៅហើយ ថាខ្លួននឹងមិនចេញ iPhone ថ្មីនោះទេ តាមរយៈការព្យាករណ៍ពីការធ្លាក់ចុះនៃការលក់ iPhone 4S នៅត្រីមាសទីពីរនេះ ពោលគឺពីខែមេសា ដល់មិថុនា ដែលជាខែដែលគេគិតថា iPhone 5 នឹងចេញ។ ការព្យាករណ៍ថានឹងធ្លាក់ដល់ទៅ១០លានគ្រឿង គឺមានន័យថា វាជាផលិតផលចាស់ ដែលតម្រូវការធ្លាក់ចុះ មិនមែនជាការចេញផលិតថ្មីនោះទេ។
ចំពោះរូបរាងថ្មីវិញ ក៏នៅតែមិនទាន់ក្លាយជាការពិតនោះដែរ ខណៈដែលកាលពីមុន ពាក្យចចាមអារាមជាច្រើន បានលើកឡើងពី iPhone ដែលស្ដើងជាងមុន វែងជាងមុន និងទទឹងធំជាងមុនជាដើម។
នៅចាំបានថា ពេលដែល Apple ចេញ iPhone 4S មានការមិនពេញចិត្តជាច្រើន ដោយសារតែមិនមានការកែប្រែនូវរូបរាងខាងក្រៅ ជាពិសេសគឺទំហំអេក្រង់ដែលមិនធំជាងមុន (៣,៥អ៊ីញ)។ ទោះយ៉ាងណាក្ដី Apple នៅតែអាចលក់បំបែកកំណត់ត្រាបានដដែល នូវទូរសព្ទថ្មីនោះ។
បើរូបរាងដើម ទទួលការគាំទ្របែបនេះទៅហើយ តើចាំបាច់អ្វីដែល Apple ត្រូវប្រឈមនឹងហានីភ័យនៃការប្ដូររូបរាងផលិតផលនោះ ?
ប្រភព
0 មតិ:
Post a Comment