.កិច្ចប្រជុំថ្នាក់រដ្ឋមន្ដ្រីការបរទេសអាស៊ាន៖
កិច្ចប្រជុំថ្នាក់រដ្ឋមន្ដ្រីការបរទេសអាស៊ាន ដឹកនាំដោយលោកឧបនាយករដ្ឋមន្ត្រី ហោ ណាំហុង បានបើកកិច្ចប្រជុំ នៅវេលាម៉ោង ៩ ព្រឹកថ្ងៃទី២ ខែមេសា ឆ្នាំ២០១២។
សេចក្តីប្រកាសព័ត៌មានលើកឡើងថា ក្នុងឱកាសកិច្ចប្រជុំនៅព្រឹកថ្ងៃចន្ទនេះ រដ្ឋមន្ដ្រីការបរទេសអាស៊ាន នឹងផ្លាស់ប្ដូរយោបល់លើបញ្ហាតំបន់ និងអន្ដរជាតិ ការអនុវត្ដធម្មនុញ្ញអាស៊ាន ជាពិសេសវិធានសម្រាប់យោងក្នុងករណីនៃការមិនអនុលោមតាម សេចក្ដីសម្រេចរបស់កិច្ចប្រជុំកំពូលអាស៊ាន។
សេចក្តីប្រកាសលើកឡើងថា រដ្ឋមន្ដ្រីការបរទេសអាស៊ាន ក៏នឹងពិនិត្យលើសេចក្ដីព្រាងសេចក្ដីថ្លែងការណ៍របស់ថ្នាក់ដឹកនាំ អាស៊ាន ស្ដីពីអាស៊ានគ្មានគ្រឿងញៀននៅឆ្នាំ២០១៥ សម្រាប់ដាក់ជូនថ្នាក់ដឹកនាំអាស៊ានអនុម័តនៅក្នុងឱកាសកិច្ចប្រជុំកំពូល អាស៊ានលើកទី២០។ ក្នុងនោះ ប្រមុខការទូតអាស៊ានទាំង១០ប្រទេសក៏នឹងពិភាក្សាលើការវិវត្តនៃ ការអនុវត្តសេចក្ដីថ្លែងការណ៍ ស្ដីពីក្រមប្រតិបត្ដិរបស់ភាគីនៅសមុទ្រចិនខាងត្បូង និងសំណើរបស់ប៉ាគីស្ថានសុំចូលជាដៃគូសន្ទនាពេញលេញរបស់អាស៊ាន។
.កិច្ចប្រជុំរដ្ឋមន្ដ្រីនៃក្រុមប្រឹក្សាសហគមន៍សេដ្ឋកិច្ចអាស៊ាន លើកទី ៧៖
កិច្ចប្រជុំរដ្ឋមន្ដ្រីនៃក្រុមប្រឹក្សាសហគមន៍សេដ្ឋកិច្ចអាស៊ាន លើកទី ៧ នៅព្រឹកនេះ ដើម្បីពិភាក្សាពីការត្រៀមរៀបចំសម្រាប់កិច្ចប្រជុំកំពូលអាស៊ានលើក ទី ២០ ដែលនឹងប្រព្រឹត្ដិទៅនៅថ្ងៃទី ៣-៤ ខែមេសា ឆ្នាំ២០១២ នៅវិមានសន្ដិភាព រាជធានីភ្នំពេញ ប្រទេសកម្ពុជា។
កិច្ចប្រជុំ នេះ ពិភាក្សាលើផលប៉ះពាល់ពីសភាពការណ៍វិវត្ដ លើសកលលោកនាពេលថ្មីៗនៅក្នុងតំបន់ និងការផ្លាស់ប្ដូរទស្សនៈ ស្ដីអំពីភាពរឹងមាំរបស់អាស៊ាន ការអនុវត្ដផែនការលំអិតសម្រាប់សហគមន៍សេដ្ឋកិច្ចអាស៊ាន ដែលគ្របដណ្ដប់លើពាណិជ្ជកម្មផ្នែកទំនិញ ពាណិជ្ជកម្ម ផ្នែកសេវាកម្ម ការវិនិយោគ ការអភិវឌ្ឍ និងសមាហរណកម្មគយ កិច្ចសហប្រតិបត្ដិការផ្នែកដឹកជញ្ជូន កិច្ចសហប្រតិបត្ដិការផ្នែកទេសចរណ៍ និងសមាហរណកម្មរូបិយវត្ថុ និងហិរញ្ញវត្ថុ។
កិច្ចប្រជុំបាន ពិភាក្សាផ្លាស់ប្ដូរទស្សនៈ លើការអនុវត្ដផែនការមេ ស្ដីពីការតភ្ជាប់តំបន់អាស៊ាន គំនិតផ្ដួចផ្ដើម/ការអភិវឌ្ឍសេដ្ឋកិច្ចប្រកបដោយសមធម៌ សម្រាប់សមាហរណកម្មអាស៊ាន និងភាពជាដៃគូសេដ្ឋកិច្ចទូលំទូលាយតំបន់អាស៊ានផងដែរ។ បញ្ហា និងការប្រឈមមុខផ្សេងៗលើសន្ដិសុខស្បៀងអាហារ និងថាមពល នឹងត្រូវលើកមកពិភាក្សានៅក្នុងកិច្ចប្រជុំផងដែរ។
លោក ចម ប្រសិទ្ធ ទេសរដ្ឋមន្ដ្រី និងជារដ្ឋមន្ដ្រីក្រសួងពាណិជ្ជកម្ម នៃព្រះរាជាណាចក្រកម្ពុជា បានដឹកនាំកិច្ចប្រជុំក្រុមប្រឹក្សាសហគមន៍សេដ្ឋកិច្ចអាស៊ានលើកទី៧ ។
.កិច្ចប្រជុំលើកទី៧ នៃក្រុមប្រឹក្សាសហគមន៍សង្គម-វប្បធម៌អាស៊ាន៖
កិច្ចប្រជុំ នេះ ប្រព្រឹត្ដទៅនៅវិមានសន្ដិភាព រាជធានីភ្នំពេញ ប្រទេសកម្ពុជា នៅព្រឹកថ្ងៃទី២ ខែមេសា ឆ្នាំ២០១២។ កិច្ចប្រជុំនេះដឹកនាំដោយលោក ស៊ុន ចាន់ថុល ទេសរដ្ឋមន្ដ្រី និងជាអនុប្រធានអចិន្ដ្រៃយ៍នៃក្រុមប្រឹក្សាអភិវឌ្ឍន៍កម្ពុជា និងជាប្រធានសម្រាប់ក្រុមប្រឹក្សាសហគមន៍សង្គម-វប្បធម៌អាស៊ាន។
កិច្ចប្រជុំ ពិចារណាលើលទ្ធផលនៃកិច្ចជុំលើកទី ១០ និង លើកទី ១១ របាយការណ៍ស្ដីពីការតភ្ជាប់តំបន់អាស៊ាន ព្រមទាំងពិនិត្យឡើងវិញនូវវឌ្ឍនភាពនៃការអនុវត្ដផែនការលំអិតនៃ ក្រុមប្រឹក្សាសហគមន៍សង្គមវប្បធម៌អាស៊ាន។
កិច្ចពិភាក្សា សំខាន់ៗផ្សេងទៀតនៃកិច្ចប្រជុំនេះ រួមមាន ការដាក់បញ្ចូលបញ្ហាកីឡាជាផ្នែកថ្មីនៅក្នុងផែនការលំអិតនៃ ក្រុមប្រឹក្សាសហគមន៍សង្គម-វប្បធម៌អាស៊ាន និងការពិចារណាលើឯកសារទស្សនទានកម្ពុជា ស្ដីពីការបង្កើតមូលនិធិ នៃក្រុមប្រឹក្សាសហគមន៍សង្គម-វប្បធម៌អាស៊ានផងដែរ។
នៅព្រឹកនេះផងដែរ ចាប់ពីម៉ោង ១០ និង ៤៥ នាទី រហូតដល់ម៉ោង ១១ និង ១៥ នាទី ក៏មានកិច្ចប្រជុំថ្នាក់រដ្ឋមន្ត្រីការបរទេសអាស៊ាន និងគណៈកម្មការអន្តររដ្ឋាភិបាលអាស៊ាន ស្តីពី សិទ្ធិមនុស្ស។ ក្នុងនោះ ក៏មានកិច្ចប្រជុំបន្តរវាងរដ្ឋមន្ដ្រីនៃក្រុមប្រឹក្សាសហគមន៍សេដ្ឋកិច្ច អាស៊ាន លើកទី ៧ និងបន្តកិច្ចប្រជុំលើកទី៧ នៃក្រុមប្រឹក្សាសហគមន៍សង្គម-វប្បធម៌អាស៊ាន។ ជាមួយគ្នានោះ ក៏មានកិច្ចប្រជុំក្រុមប្រឹក្សាសហគមន៍នយោបាយ-សន្តិសុខអាស៊ាន លើកទី៧ផងដែរ៕ CEN
0 មតិ:
Post a Comment