ក្រុងរីយ៉ូដឹចាណេរ៉ូៈ ព្រះរាជអាជ្ញានៅក្នុងប្រទេសប្រេស៊ីល កំពុងព្យាយាមជាលើកទីពីរក្នុងការហាមឃាត់ក្រុមហ៊ុន Chevron Corp និងក្រុមហ៊ុន Transocean Ltd មិនឲ្យប្រតិបត្តិការនៅក្នុងប្រទេសរបស់ខ្លួន បន្ទាប់ពីមានការលិចធ្លាយប្រេងចំនួន ៣ពាន់ធុងមកនោះ។
លោកព្រះរាជអាជ្ញា Gisele Porto បានឲ្យដឹងនៅក្នុងបណ្តឹងឧទ្ទរណ៍មួយកាលពីថ្ងៃទី២៦ ខែមីនា ដែលទីភ្នាក់ងារព័ត៌មាន Bloomberg ទទួលបានថា ក្រុមហ៊ុនទាំងពីរខាងលើ ត្រូវបានផ្អាកមិនឲ្យដំណើរការរហូតដល់ក្រុមហ៊ុនទាំងពីរនេះ អាចបញ្ឈប់ការប៉ះពាល់ដល់បរិស្ថានពីការលិចធ្លាយប្រេងកាលពីខែ វិច្ឆិកានៅឆ្នេរ Rio de Janeiro សិន។ លោក Porto បានឲ្យដឹងទៀតថា ក្រុមហ៊ុនទាំងពីរ នឹងត្រូវផាកពិន័យជាប្រាក់ចំនួន ៥០០លានរ៉េអាល់ (២៧៣លានដុល្លារ) ក្នុងមួយថ្ងៃ បើក្រុមហ៊ុនទាំងពីរនេះ មិនគោរពតាមសេចក្តីសម្រេចរបស់តុលាការស្តីពីការផ្អាកអាជីវកម្ម នេះ។
ក្រុមហ៊ុន Chevron កំពុងប្រឈមនឹងការប្រឆាំងយ៉ាងខ្លាំងជាបន្តបន្ទាប់ពីសំណាក់អ្នក នយោបាយ ព្រះរាជអាជ្ញា និងនិយ័តករនៅក្នុងប្រេស៊ីល បន្ទាប់ពីការលិចធ្លាយប្រេងនៅក្នុងគម្រោង Frade ដែលមានតម្លៃ ៣,៦ពាន់លានដុល្លារកាលពីខែវិច្ឆិកា និងការលេចធ្លាយប្រេងជាលើកទីពីរកាលពីខែមីនាមក។ Phnom Penh Post
0 មតិ:
Post a Comment