សាក្សីមួយរូបឈ្មោះ សាឡុត បាន ឬ សូ ហុង ដែលជាក្មួយបង្កើតរបស់ សាឡុត ស ឬ ប៉ុល ពត បានចូលផ្ដល់សក្ខីកម្មមួយប្រឆាំងជនជាប់ចោទ អៀង សារី នៅក្នុងសវនាការសាលាដំបូង នៅថ្ងៃទី ២៣ ខែមេសា ឆ្នាំ ២០១២ នេះ។
នៅក្នុងសវនាការ សាក្សី សាឡុត បាន បានផ្ដល់សក្ខីកម្មដល់សហព្រះរាជអាជ្ញាថា ជនជាប់ចោទ អៀង សារី ជាអ្នកទទួលខុសត្រូវពួកបញ្ញវន្ត កាលពីក្នុងរបបកម្ពុជាប្រជាធិបតេយ្យ។
សំឡេង៖ «ខ្ញុំចាំមិនច្បាស់ទេឈ្មោះ។ ក៏ប៉ុន្តែ ខ្ញុំដឹងថាមានបញ្ញាជនខ្លះៗ មកជាមួយគាត់»។
ការផ្ដល់សក្ខីកម្មនេះ គឺដោយសារតែសាក្សី សាឡុត បាន ឈ្មោះបដិវត្តន៍ហៅសមមិត្ត សូ ហុង ជាអតីតកម្មាភិបាលជាន់ខ្ពស់មួយរូប នៃក្រសួងការបរទេស ក្រោមការគ្រប់គ្រងរបស់ជនជាប់ចោទ អៀង សារី។ លោកមានតួនាទីជាអគ្គលេខាធិការក្រសួងការបរទេសនៃរបបកម្ពុជា ប្រជាធិបតេយ្យ។
សាឡុត បាន៖ «ជាពិសេសបង អៀង សារី ថា ជួយការងារខ្ញុំផង។ ជួយជាដៃជាជើង។ ជាតួនាទីអគ្គលេខាធិការក្រសួងការបរទេស។ ខ្ញុំក៏មិនសូវយល់ដែរ អគ្គលេខាធិការហ្នឹងអីៗ ខ្ញុំមិនសូវយល់ទេ ព្រោះជាកសិករសេរីនោះ។ គាត់ថាអត់អីទេ គ្រាន់តែមើលការខុសត្រូវ ឱ្យបងប្អូនមានការឯកភាពគ្នា។ នេះជាការងាររបស់ខ្ញុំសំខាន់»។
នៅក្នុងរបបកម្ពុជាប្រជាធិបតេយ្យចន្លោះពីឆ្នាំ ១៩៧៥ ដល់១៩៧៩ មានក្រុមបញ្ញាវ័ន្តនៅបរទេសជាច្រើនរូប បានវិលត្រឡប់មកកម្ពុជាវិញ ហើយភាគច្រើនបំផុត ត្រូវពួកខ្មែរក្រហមសម្លាប់។ ការសម្លាប់បញ្ញវន្តទាំងនោះ ត្រូវបានគេជឿថាមានការពាក់ព័ន្ធនឹងក្រសួងការបរទេស ដែលជនជាប់ចោទជារដ្ឋមន្ត្រី។
សាក្សី សាឡុត បាន ឬ សូ ហុង ថ្លែងថា ក្រសួងការបរទេសនៅពេលនោះ មានការបែងចែកជា ២ ផ្នែកធំៗ ២ គឺ ទី១ កិច្ចការបរទេស ដែលច្រើនតែការងាររបស់ក្រុមបញ្ញាជន និងទី២ គឺការងារសេដ្ឋកិច្ច និងសតិអារម្មណ៍។ គាត់ថា គាត់មិនបានទទួលខុសត្រូវលើក្រុមបញ្ញាជនទេ គឺគាត់ទទួលខាងបង្កបង្កើនផល និងផ្នែកអប់រំសតិអារម្មណ៍បុគ្គលិក ដែលធ្វើការនៅក្រសួងការបរទេសនោះ ៣/០៣។ ក្រៅពីនេះ នៅមានផ្នែកតូចៗ ខ្លះទៀត ក្នុងនោះ គាត់បានរំឭកអំពីសកម្មភាពខ្លះ។
សំឡេង៖ «ពេលខ្លះខ្ញុំឃើញប្រជុំជាមួយគណៈនេះទៅគណៈនោះទៅ មានបង គាត ឈន់ មានបង សួង ស៊ីគឿន មានឈ្មោះ សូ សែ... ខ្ញុំរៀបរាប់មិនអស់ទេ ខាងបច្ចេកទេសក្រសួងហ្នឹងបាទ»។
ក្រៅពីសក្ខីកម្មទាក់ទងនឹងជនជាប់ចោទ អៀង សារី សាក្សី សាឡុត បាន ក៏បានរំឭកអំពីតួនាទីរបស់ជនជាប់ចោទ នួន ជា ដែរ។
សំឡេង៖ «ខ្ញុំដឹងថា លោក នួន ជា ទទួលខុសត្រូវខាងចាត់តាំង។ ឯចាត់តាំងអីៗ ខ្ញុំអត់ដឹងទេ»។
នៅមុនរបបកម្ពុជាប្រជាធិបតេយ្យ ឆ្នាំ ១៩៧៥ សាក្សី សាឡុត បាន ឬ សូ ហុង ធ្លាប់ជានីរសារផ្ទាល់របស់ សាឡុត ស ឬ ប៉ុល ពត ដែលជាឪពុកមាបង្កើតរបស់គាត់។
មានអ្នករងគ្រោះក្នុងរបបខ្មែរក្រហមខ្លះ បានរំឭកថា លោក សាឡុត បាន ឬ សូ ហុង ជាកម្មាភិបាលសំខាន់មួយរូប នៅក្រសួងការបរទេស ក្នុងតួនាទីគាត់ជាអគ្គលេខាធិការក្រសួង ដែលនៅផ្ទាល់នឹងជនជាប់ចោទ អៀង សារី។
សក្ខីកម្មរបស់សាក្សី សាឡុត បាន នឹងត្រូវធ្វើបន្តទៀត នៅថ្ងៃអង្គារទី ២៤ ខែមេសា ឆ្នាំ ២០១២៕
RFA
0 មតិ:
Post a Comment